BREVE PRESENTACIóN

Comeza aquí unha nova andaina para a Asociación Xuveníl Xo1dreira, que agardamos sexa do voso

agrado. Camiñade connosco

Cando chegue esta publicación ás vosas mans a Asociación Xuvenil Xoldreira virá de cumprir un ano de existencia. Un ano no cal fomos capaces de artellar actividades que serviron para lle dar alternativas válidas a unha xuventude que esquecera o propio concepto de gavilla. É máis, dende hai anos poucas actividades se levaron adiante máis alá de competicións deportivas nunha zona que, excepcionalmente, mantén unha poboación xuvenil importante.

ó longo deste ano de existencia ocorreron unha serie de acontecementos -falamos dos incendios forestais (a Bola o concello con máis hectáreas queimadas no ano 2002), da marea negra do Prestige (quilómetros e quilómetros da costa galega afogada en chapapote pola incompetencia), dunha guerra contra Iraq (na que participa o Estado desoíndo os berros en contra da maioría da poboación)...- que, sumados a outros anteriores e endémicos -como o elevado desemprego, o esquecemento da xuventude, a continua emigración da nosa xente a outras terras...- indubidablemente marcarán o noso futuro.

A isto súmase a noticia da inminente construcción dunha central hidroeléctrica no río Arnoia ó seu paso polo concello da Merca a cal hipotecará o noso futuro e asolará unha paraxe natural de incalculable valor.

Fronte á pasividade e ante o grao de descoñecemento da xente (efectos ambientais, socioeconómicos... xurdiu a idea de dar a luz a esta publicación e outras actividades relacionadas que pretendemos sirvan para informar ós veciños e á mocidade neste e noutros temas. Pero non só nace con motivo de reaccionar puntualmente a este estado de cousas, senón con vocación de continuidade, de xeito que siga dando vida á xuventude e á zona.

Por suposto que para acadar este obxectivo da continuidade tedes un papel moi importante vós os lectores. Con un mínimo de interese que amosedes e cun pouco que aprendades ou saquedes en limpo do que aquí vos amosamos xa. nos fará sentir contentos. Vaia pois o noso agradecemento por adiantado ós lectores pola súa atención e pola colaboración que no futuro queirades prestar.

Ademais queremos dar as gracias tamén á inestimable colaboración prestada polos colectivos Amigos da Terra e Asociación para a Defensa Ecolóxica de Galiza (ADEGA), e ó noso benquerido Lois Antón que nos cedeu as súas verbas.

Salir